Still-

‘Still’ (1998) do compositor suízo Beat Furrer, é unha obra que parte moitas liñas en contrapunto que son filtradas continuamente. A superposición destas liñas avanza progresivamente desde a harmonía ata o ruído, como un texto que é lido moitas veces por voces distintas, e que aos poucos vai perdendo o seu significado.

‘Gran Hotel Abismo’ (2021) é un encargo do Institut Valencià de Cultura á compositora valenciana, fincada en Graz, Claudia Cañamero. Nesta obra, un grupo de instrumentos crean xestos, figuras que se escoitan e que parten dunha conversación entre Georg Lukács e Theodor Adorno sobre a Escola de Frankfurt. “Están vostedes aloxados no Gran Hotel Abismo, mentres critican o mundo capitalista ao bordo do colapso. A sensación de que algo está a piques de romper, fai que sintamos, con todo, nun lugar seguro”.

‘A lumière du noir’ (2010) do compositor Alberto Pousadas, é un gran tratado sobre a materia sonora, onde diferentes texturas crean un espazo denso, crescendos que fan que o son poida escurecerse ou atopar novos brillos. Nesta obra, a harmonía do espectro harmónico é tan densa que moitas veces sentimos que o conxunto instrumental é inmenso, que todo o espazo ecoa por si só como unha gran caverna, que todo pode estalar en mil pedazos en calquera momento.

‘Libro delle immagini V – im Weiten, Leichten, Kalten’ (2023) é unha das pezas compostas polo compositor Hugo Gómez-Chao Porta durante a súa estancia na Real Academia de España en 2022-2023. Segundo as palabras do propio compositor: “E como única resposta, vento. E contra ese vento, aparecéndose, levantándose, atravesando o espazo, algúns signos: carne, axitación da carne, figuras e corpos feitos de ausencia, corpos desaparecendo na violencia dese bulebule. É unha fuxida desastrosa en plena noite. E entón, amence. Emerxe un recordo mínimo e moi afastado. De súpeto, algo soa noutro lugar. Viramos a cabeza. Xa se foi.”